Mini lieblingsfarb isch grau

Vor allem d Grautön wo de Herbscht mit sich bringt

Di blutte Rotbuechestämm

wo matt silbrig erschiined

Umrahmt vo ihrem luut raschelnde fascht Roschtroote Laub

Und d Grautöön wo d Gwitterfronte mit sich träged

wenn d Luft ufenand schloot und sich d Schatte vedichted

d Forme wiedergebed

wo ohni Liecht chuum läsbahr währed

ihres überschloo

erschafft flüssendi Veläuf

und stellewiis doch brochni scharfi Kannte

vo schwach gäl übo chaltblau grau und fliedergraui Spränkel

matt rosa ränder wiit im Hindergrund vom Firmament

devoor fetze vo schnell verbii ziehendem wetter

ihri Ströhm sind underschiidlich schnell

i gsee die veschidene Windebene ahand vo ihrne Bahne

gnüüs wie sie sich vortwährend veändered

mag

dases vebii isch während und sobalz entstoot

dases entwachst und zerfallt im Moment wo d Wolche sind

und bi beiidruckt devo

das de Himmel oft so groos isch

dasi en mit mene Blickfeld nöd z Fasse vemag

Zwüsched em hellgraue bröcklige chalch Gstei

de fliehende brüch und de gähnende scharfe Schatte gebed sich harti Strukture d Hand

de Rhythmus vom Breche

vom Gstei

vormuliert min Iidruck iidrücklich

i mag grau