du chasches nöd so guet
und i nimms Dir us de Händ, öffnes und gib ders Glas wieder zrug.

und mi gwöhned üs draa das i dini Glässer uufschruub, en Automatismuss, du probiersch es nümm selber
i bi jo doo

doch wa isch mit all dene Moment woni nöd bi Dir bin, du nöd mit Mir?
Bisch denn Sicher, geborge, wohlbehalte? i ha Angscht um Dis Wohlbehalte, will di beschütze, sicher wüsse.

Und so rummi immer meh Glässer weg, damit din Wäg frei isch, öffne Si bevort si bruchsch, mi geschweigedenn froogsch

und jetzt stömmer imne Ruum voll g öffnete Glässer, unbruuchte Ressource und hilflose Gfühl. Du chasch di nüm recht bewege
da regt di uuf
doch du machsch dii chlii

i ha nur wölle dasd du in Sicherheit bisch

ä Glass gheit um und splitteret wo du en schritt uf mi zue machsch.

Achtsam wiichsch de Scherbe uus und dini Hand leit sich i mini

wärmi und vetrautheit strömed ii
und i schnuuf dure. dä Gruch vo de Salzlacke wo ufem Bode tröchnet schloot mer entgege.

En liechte Druck vo Dine Finger holt mi zrug und dini Stimm erhebt sich

Du beschützisch mi nöd
wennt mi bevormundisch
du beschützisch mi
i demm dasst a mi Glaubsch
mir vertrausch und zuetrausch dasi ä Lösig werd finde
oder wenni möcht, um Hilf bitte werd.

Dini Gwüssheit, din Glaube i mini Fähigkeite macht mi sooo viel stärcher wie dini schwebendi Angscht.

Du chasch mi nöd beschütze, mir chönd Fähler, verletzige passiere und du chasch nünt degege mache.
Will i bi erwachse und underwegs und du nöd immer mit debii.

und da isch guet so, will Autonomie und Freiheit sooooo wichtig sind.
wills wichtig isch das i entscheid welli Gläser i g öffnet ha möcht, welli i bruuch. Und will i di werd frooge wenni dini Hilf möcht

und villicht wirds Moment gee wo du chöntisch hälfe und i dini Hilf schlicht nöd möcht oder chan aa nee
und au denn isches wichtig das i entscheid, über mi
und nöd du